مقالات رأي

نشوى سلامة تكتب:  واحدة واحدة

طالما المثل بتاع اضرب المربوط يخاف السايب هو اللى جايب نتيجة ،يبقى ياريت يا حكومة يبقى فيه كل ساعة كبسة موش بس عل الكمامة .

عايزين كبسة من وزارة البيئة على نظافة المكان ، وكبسة من التموين على صلاحية المنتجات، وكبسة من الصحة على شهادات العاملين ، وكبسة من الشرطة على المحششين بتوع الاصطباحة، وكبسة من وزارة التربية والتعليم تلف الشارع تلم العيال اللى بتهرب من المدرسة ، اللى طبعا مافيش منها دلوقت ، وكبسة من المرور على السياس وبلطجتهم ، موش بس على الرخص ، وكبسة تلزم السائق يصلح موتور عربيتة اللى عمتنا دخان وتلوث وبوظت صدورنا .

محتاجين انضباط فى الشارع اكتر من كده يمكن الناس تتعود تلتزم بدل ماهم فالقينا بشعار ، تطبيق القوانين وهم اول من يخرجون عنها

شوف الدولة جمعت فلوس اد ايه كغرامات لعدم الالتزام بالكمامة ، ونتمنى طبعا توجيهها لدعم القطاع الصحى الذى يتسبب هؤلاء المستهترون فى ارباكه والضغط عليه بسبب تزايد الحالات

شوف لو كل قطاع عمل غرامات فورية مستحقة وأشدد على لفظة مستحقة وأصلح بها ولو جزءاً بسيطاً من أى قطاع ، هيبقى زى ما المثل بيقول من دقنه وأفتل له ، وبرضه الهدف موش تغريم الناس عمال على بطال ، لكن الهدف هو تعليمهم الالتزام ، الالتزام الذى افتقدناه كلنا ولا نستثنى آحداً ، فكلنا متجاوزون ، وكلنا متغافلون حتى تأتينا الشدة التى ترغمنا على فعل الشىء

إحتمال لو تم الانضباط لفترة بالفعل ننجح ، ماهو مافيش حاجة بتيجى مرة واحدة ، ولا ينفع الكون ينصلح فى اسابيع ، لكن كل حاجة لو بدأناها وعزمنا على الا نهملها ستستمر ، كل حاجة بتيجى واحدة واحدة .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى